Жаңа маусым: шаһар тарихынан сыр шертетін «Алматинские истории» жобасы көрерменге жол тартты

Almaty.TV жаңа маусымын бастады. Жыл сайын көрерменін тың телевизиялық жобалармен қуантатын арна ұжымы бұл жолы да дәстүрден жаңылмады.

Арайлы Алматының тыныс-тіршілігімен біте қайнасып, халықпен жасасып келе жатқан арна тарихы тереңде жатыр. Былтыр мерейтойын атап өткен телеарна жыл сайын екі телевизиялық маусым ұсынуды қолға алды. Бірін Ұлыстың Ұлы күні әз-Наурыздың қарсаңында бастағалы отырған ұжым көрерменіне ерекше сый әзірлеп отыр. Олардың қатарында көпшіліктің көңілінен шыққан «Біржан-Сара ізімен» айтысы, «Алматы ән қанатында» музыкалық жобасы бар. 

Сондай-ақ арна ұжымы «Жұлдызды караоке» және «Дода» сынды үздік шоу-бағдарламалар ұсынады. Шаһар тарихынан сыр шертетін «Алматинские истории» жобасы да жалғасады.

 «Бірнеше жылдан бері жалғасып келе жатқан жобалардың бірі – танымдық бағыттағы «Алматинские истории» бағдарламасы. Алматының құрылғанынан бастап, қаланың тарихына тоқталып, қызықты кейіпкерлермен таныстырамыз. Жобаны 22 наурызда көрерменге ұсынамыз. Бұл – әлем бойынша көрерменін жинаған хабарлардың бірі», – деді Аlmaty TV продюсерлік бөлімінің жетекшісі Әйгерім Асқарбай.

Жаңа маусымда халықтың әлеуметтік әлеуетін көрсететін «Обо всем без купюр», 5 жылдан бері таңмен таласа телеарна көрермендеріне көңіл-күй сыйлайтын «Таңғы студио» шоу бағдарламасы көгілдір экраннан көрсетіледі.

Телеарна өткен айдан бастап «Made in Almaty», «Алматы көшелері» «Экономика жаңалығы», «Қала тынысы» айдарларын қолға алды. Сондай-ақ «Шаһар шырайы» тележобасы көрерменге ұсынылды. Одан бөлек, «Тәулік тізбесі», «Күн тақырыбы», «Айтылды-Орындалды» сынды айдарлар жарыққа шықты. Жуырда «Алматы аудандары» және «Кері байланыс» жобалары көгілдір экранға жол тартады.

Жүйелі жұмыстың нәтижесінде соңғы 3 жылда көрерменнің телеарнаға деген қызығушылығы айтарлықтай артты. Сондай-ақ сайттың қаралымы 5 есеге, яғни 9 млн пайдаланушыдан 47 миллионға дейін өсті. Коммерциялық кіріс көлемі де 3 есеге көбейген. Ал мемлекеттік тілдегі өнім үлесі 88 пайызға дейін ұлғайды.

«Алматы» телеарнасы көрерменін тың жобалармен, қоғамның тыныс-тіршілігін боямасыз баяндайтын бағдарламалармен, мәдени һәм ойын-сауық жобалармен қуантуға қашан да әзір.

Гүлмарал Изатқызы, Мейрам Исабеков

Оқи отырыңыз: Сүт өнімдерін өңдеу: Almaty TV арнасында «Made in Almaty» бағдарламасының жаңа шығарылымы