Экологтар дабыл қақты: Атырауда кәріз суы төгілетін аумақ қашан тазартылады

Атыраудағы «Квадрат» булану алаңын тазарту жұмысы тағы да кейінге шегерілді. Бұған дейін ауысқан әкім-қаралар биыл жұмыс толық аяқталады деп уәде берген еді. Бірақ бәрі тек сөз жүзінде қалып отыр. Соның салдарынан аймақ ластанып жатыр деп экологтар дабыл қақты, деп хабарлайды Аlmaty.tv.

Аумағы 500 гектарды құрайтын булану алаңына ай сайын қаланың оң жақ бөлігінен 442 мың текше метрдей кәріз суы төгіледі. Бұған дейін аймақты басқарған екі әкім де халық алдындағы есебінде 2025 жылға дейін рекультивациялау жұмыстарын аяқтаймыз деп уәде берген еді. Бірақ шаруа бітпепті. Кейіннен қайтадан мемлекеттік сараптама тағайындалған.

«Білуімше, жоба мемлекеттік сараптамадан өтті. Біз оның өзгертілген нұсқасын күтіп отырмыз. Ал қазір қыста істен шыққан техникамызды жөндеп, жұмысқа дайындалып жатырмыз», - деді «Павлодар өзен порты» АҚ жоба жетекшісі Дидар Әліпов.

Жобаға 7 млрд теңгеден астам қаржы бөлінген. Оның 4 млрд теңгесі игеріліп, біраз шаруа жасалыпты. Ал Экология департаментіндегілер жұмыстың тоқтап қалуына құрылыс материалдарының қымбаттауы себеп дейді.

«Негізгі себеп – кейбір құрылыс материалдарының қымбаттауы. Өзімізге мердігер компания осылай түсіндірді. Негізі бұл жоба 2019 жылы қолға алынған. Қазір 2025 жыл болды. Құрылыс жабдықтарының бағасында айтарлықтай өзгерістер бар. Жыл сайын Атырау облысы бойынша экологиялық мәселелерді шешу аясында 10-12 млрд теңге бөлінеді, ол қаржы сол мақсатта жұмсалып жатыр», - деді Атырау облыстық экология департаментінің басшысы Асқар Жүсіпов.

Жауаптылар алда жұмыстың қайта жанданатынын айтып, жылдар бойы ластанған топырақ қабаты тазартылады деп сендірді. Рекультивациялаудан кейін ағаш отырғызуды жоспарлапты.

Жұлдыз Қайратқызы, «Алматы» телеарнасы, Атыраудан

Оқи отырыңыз: Шымкентте таксиге отырған бойжеткенді бір топ еркек зорлап кеткен