Жыл басынан бері елімізде жол апатынан 17 бала көз жұмған

Ішкі істер министрлігі жол ережесін өрескел бұзатын жүргізушілерге жазаны қатаңдатты. Жылдамдықты асыруды әдетке айналдырған азаматтар енді бұл тәртіпбұзушылық үшін 40 айлық есептік көрсеткіш мөлшерінде айыппұл төлейді. Ал қарсы жолаққа шыққан жүргізушілер 6 айға дейін көлік басқару куәлігінен айырылады, деп хабарлайды Аlmaty.tv.  

Жалпы, елде әрбір төртінші жол-көлік оқиғасы балалардың қатысуымен болады екен. Статистикаға сүйенсек, жыл басынан бері осындай мыңнан астам жағдай тіркеліпті. Соның салдарынан 17 бала көз жұмып, 1500-ге жуық жеткіншек түрлі жарақат алған. Осыған байланысты Әкімшілік полиция комитетінің төрағасы ата-аналарға балалардың жолдан қауіпсіз өтуін қадағалау керек екенін ескертті.  

«Балалардың жолдағы қауіпсіздігі көп жағдайда ата-аналарға байланысты екенін атап өту қажет, өйткені балалар ересектердің мінез-құлқын қайталайды. Жаяу жүргінші, велосипедші немесе самокат жүргізуші ретінде балаларға жолдағы қауіпсіздік ережелерін түсіндіру қажет деп есептейміз. Жол жүрісі қағидаларын сақтаңыз және балаларға абай болыңыздар!» - деді ҚР Ішкі істер министрлігі әкімшілік полиция комитетінің төрағасы Қайсар Сұлтанбаев.

Оқи отырыңыз: Астана іргесіндегі ауыл тұрғындары қоқыс полигонының жабылуын талап етті