Қазақстан мен Ресей гуманитарлық ынтымақтастық іс-шараларын жалғастырмақ

Ұлы жеңістің 80 жылдығына орай Алматыда халықаралық конференция өтті

Алматыдағы Достық үйінде Қазақстан мен Ресейдің гуманитарлық ынтымақтастық саласындағы іс-шаралар жоспарына қол қойылды. Маңызды рәсім «Жеңістің естелігі: ұрпақтар мен халықтардың бірлігі» атты халықаралық конференция аясында ұйымдастырылды, деп хабарлайды Аlmaty.tv тілшісі.

Екі тарап, волонтерлік іске көңіл бөлуге, кино және медиа саласын бірлесе өркендетуге уағдаласты. Басқосу Ұлы жеңістің 80 жылдығына орай өткізілгендіктен, майдан шебінде және оның тысында жүріп ерлік көрсеткендерге қатысты естеліктер де айтылды.

«Ұлы Жеңіс — жүздеген миллион адамның ерен еңбегі мен жанқиярлығының нәтижесі. Бұл үлесті нақты өлшеу мүмкін емес. Оны қандай да бір нарықтық түсінікпен – «бағамен» өлшеу қиын. Дегенмен бұл Жеңістің қазақ халқы үшін нені білдіретініне тоқталып өтейік. Соғыс басталған алғашқы күндерден бастап-ақ қазақстандықтар жаппай мобилизацияға қатысты. Тарихшылардың мәліметіне сүйенсек, 1941 жылғы 22 маусымнан 1945 жылғы 31 желтоқсанға дейін Қазақстаннан 1 196 164 адам әскерге шақырылған. Бұл – сол кездегі республика халқының әр бесінші адамы майданға аттанды деген сөз!» - деді ҚР Мәдениет және ақпарат министрі Аида Балаева.

Жеңіс күнін жақындатуға орасан үлес қосқан азаматтар жайында сөз қозғаған министр Қазақстан мен Ресей арасындағы киноиндустрияның даму кезеңдеріне де тоқталды. Жиында соғыс жылдары түсірілген 30 фильмнің аты аталды. Одан бөлек, музыка өнерінде шеберлік танытқандардың еңбегі айтылып, қаза болған майдангерлерге қатысты дерек берілді.