Қазақстанда әлеуметтік деректердің цифрлық платформасы іске қосылды

Елімізде әлеуметтік деректердің цифрлық платформасы іске қосылды. Ғылым күні қарсаңында Философия, саясаттану және дінтану институты бірегей инновациялық жобаның тұсауын кесті, деп хабарлайды Аlmaty.tv тілшісі.  

Ғылым және жоғары білім министрлігінің қолдауымен қосылған платформа әлеуметтік процестер мен қоғамдық пікір туралы ақпаратты жинауға, сақтауға, талдап, зерттеу жасауға арналған. Деректер соңғы онжылдықта жинақтаған әлеуметтік қордың негізінде жасалған екен.

Жоба авторы әрі жетекшісі Шолпан Жаманбалаеваның айтуынша, жоба ақпараттың ашықтығын қамтамасыз етіп, сапалы ғылыми талдау жасауға бағытталған.

«Елімізде әлеуметтік деректерді жинайтын ортақ жинақ болған жоқ. Біз зерттеушілер қауымдастығына әлеуметтанулық деректерді талдау, гипотезаларды сынау және трендтерді анықтау мүмкіндігін ұсынамыз. Бұл әлеуметтік процестерді тереңірек түсінуге мүмкіндік береді», - деді Философия, саясаттану және дінтану институты директорының міндетін атқарушы Шолпан Жаманбалаева.

Жоба әсіресе жас ғалымдар үшін тиімді екен. Олар платформаны өз ғылыми жобалары мен диссертациялық жұмыстарына қолдана бастаған. Жақын уақытта онлайн-сауалнамаларға арналған мобильді қосымша іске қосылып, жасанды интеллектіге негізделген цифрлық көмекші де әзірленбек.  

«Соңғы он жыл көлемінде жинақталған зерттеулердің қоры бар. Және де болашақта бұл қор толтырылатын болады. Бұл - қор қызметкерлерге, зерттеушілерге үлкен мүмкіндік. Ғылыми зерттеудің нәтижесімен танысып, талдап нәтижелерін көруге болады. Барлығы ашық түрдеөтті», - деді Цифрлық әлеуметтік ғылымдар орталығы басшысының орынбасары Жасұлан Төлеуов.

Оқи отырыңыз: Қазақстан мен Ресей гуманитарлық ынтымақтастық іс-шараларын жалғастырмақ