Қоғамдық көлік пен арнайы техниканы жаңартуға 109 миллиард теңге қажет – министр

Өнеркәсіп және құрылыс министрі Ерсайын Нағаспаев елдегі өнеркәсіпті дамыту үшін қанша қаражат керек екенін айтты, деп хабарлайды Almaty.tv тілшісі ҚазАқпаратқа сілтеме жасап.

Президент Қасым-Жомарт Тоқаев Үкіметтің кеңейтілген отырысында өңдеу өнеркәсібінің өсу үрдісін «бекітуді» тапсырған еді.

«Өңдеу өнеркәсібін дамыту үшін биыл 1,5 триллион теңгеге 190 жоба енгізілетін болады. Оған қоса, жалпы құны 15,3 триллион теңге болатын 417 жоба бойынша жұмыс басталды. Бұл жобаларды жеке инвестициялар, екінші деңгейлі банктер және даму институттары есебінен қаржыландыру көзделген», − деді жаңа министр Үкімет отырысында.

Қазір 1,1 трлн теңгеден астам сомаға өңдеу өнеркәсібі жобаларын қаржыландыру пысықталуда. Атап айтқанда, Қазақстан Даму банкі бойынша ірі жобаларды іске асыру үшін 183 миллиардтан астам теңгеге қажеттілік бар.

«Өнеркәсіпті дамыту қоры» бойынша — орта және шағын жобаларды іске асыруға 800 миллиард теңге қажет. Соның ішінде биыл шағын бизнестің ерекше сұранысына ие шағын өнеркәсіптік аймақтарды қаржыландыруға шамамен 100 миллиард теңге қажет. Бұл шаралар өнеркәсіптің өсуіне, жаңа жұмыс орындарын құруға және экономика салаларының дамуына мүмкіндік береді», − дейді Ерсайын Нағаспаев.

Сонымен бірге, «Өнеркәсіпті дамыту қоры» арқылы қоғамдық көлік пен арнайы техниканы жаңарту үшін лизингке шамамен 109 миллиард теңге қажет.

«Нәтижесінде, алдағы екі жылда 900-ге жуық жаңа автобус, сондай-ақ шұғыл және коммуналдық қызметтерге арналған 800-ден астам арнайы техника жеткізіледі», − деді Өнеркәсіп министрі.

Айта кетейік, бүгін Өнеркәсіп және құрылыс министрі қызметіне кіріскен Ерсайын Нағаспаев Үкімет үйінде ант қабылдады.

Оқи отырыңыз: Қазақстандықтар төлқұжатын онлайн режимде ала алады