Президент шыршасы: жаңа жылдық мерекеге әр өңірден келген 100 бала қатысты

Астанада дәстүрлі Президент шыршасы өтті. Жаңа жылдық мерекеге еліміздің барлық өңірінен оқуда озат, спортта, шығармашылықта жетістіктерге жеткен 100 бала қатысты, деп хабарлайды Almaty.tv тілшісі.

Түрлі-түсті ойыншықтармен безендірілген шырша, әртүрлі ертегі кейіпкерлері, Аяз ата мен Ақшақар бүлдіршіндерге тамаша көңіл-күй сыйлады. Оқушыларға Елорданың әсем жерлері мен мұражайларына экскурсия ұйымдастырылып, театр мен кинотеатрға барды. Оқу-ағарту министрі Президент Қасым-Жомарт Тоқаевтың атынан әр балаға сыйлық үлестіріп, жаңа жылдық құттықтау хатын табыстады.

"Президенттік шырша еліміздің барлық өңірінде өтті. Жалпы 4 мыңнан аса бала қатысты. Балаларға Президенттің атынан құттықтау хат және сыйлық табысталды. Сыйлыққа планшеттер, ұялы телефондар және балаларға арналған кітаптар сыйға тартылып отыр. ойыншықтар және тәттілер берілді", – деді ҚР Оқу-ағарту вице-министрі Еділ Оспан.

Елордада өткен Президент шыршасына әр өңірден бес баланы облыстық комиссия ережеге сәйкес таңдап ұсынған. Соның бірі Ақтөбеден келген 7 сынып оқушысы Жасна Орақбай жаңа жылдық шараға ерекше дайындалған. Ол өзі жақсы көретін ертегінің кейіпкері Қар Ханшайымының образын таңдаған. Оқушының көйлегін тігуге мектеп директоры мен ұстаздар, ата-аналар атсалысыпты.

"Көңіл-күйім өте жоғары. Президенттік шыршаға келгеніме өте қатты қуаныштымын. Сол себепті ҚР Президентіне Қасым-Жомарт Кемелұлы Тоқаевқа және менің мектебімдегі директорға, апайларыма алғыс айтамын! Маған бәрі ұнады", – деді 7 сынып оқушысы Жасна Орақбай.

Оқи отырыңыз: Ертегі әлемі: Алматыда Президент шыршасы өтті