Сарапшы: Алматыда сараптамалық алаң ашылды

Алматыда Жастар саясаты басқармасы жанынан «Сарапшы» атты жаңа сараптамалық алаң ашылды. Бұл ақпараттық кеңістік жаңа тұлғаларды танытып, өзекті қоғамдық мәселелер бойынша пікір таластыруға мүмкіндік береді, деп хабарлайды Almaty.tv.

Сондай-ақ жастарды ғылым мен шығармашылыққа баулып, олардың көшбасшылық қабілеттерін дамытуға бағытталған. Мұнда жас ғалымдар мен сарапшылар идея алмасып, ғылыми және әлеуметтік-мәдени жобаларда бірлесіп жұмыс істей алады.

 Бұл алаңда жастарды жинап, түрлі өзекті мәселелерді талқылап қана қоймай, шешімін табуға тырысамыз. Алматы қаласының сарапшыларды шақырып, мәселелерді түйінін шешіп және әр іс-шараның соңында нәтижесін қажетті органға жіберіп отырамыз», – деді «Сарапшы» сараптамалық алаңының жетекшісі Еңлік Ормаханова.

Жаңа сараптамалық алаңның ашылуына орай «Жастар кәсіпкерлігін дамыту және ілгерілету» тақырыбында іс-шара өтті. Басқосуда қаладағы жас кәсіп иелерінің жетістіктері таныстырылды. Жиын барысында олар стартап-жобаларға тартылып, тәжірибе алмасуға мүмкіндік алды. Іс-шара жастардың ғылыми және шығармашылық әлеуетін дамытуға ықпал етті.

 «Жастарға бизнесті қалай ашу керек, қандай бағытта ашу керек, өздеріне қызықты салада жобаны қалай бастайтынын айтамын. Кішкентай кезімнен құс шаруашылығына қызығып келемін. Бұл сала менде хобби ретінде басталып, ары қарай бизнеске айналып кетті. Демек әр адам қызығатын бір бағыты болады. Сол қызығатын бағытпен кәсіп бастасаң, үлкен табыс алып келеді, – деді Алматы технологиялық университетінің 4-курс студенті Асқар Иманбек.

Оқи отырыңыз: Балалар мен жасөспірімдер спортына көбірек көңіл бөлінбек