Алматы жастары: 6000-нан астам маман өтінім тапсырған

Оңтүстік астанамызда жастарды баспанамен қамтуды көздейтін «Алматы жастары» бағдарламасына өтінім қабылдау аяқталды. Биыл мүмкіндікке кемінде 2 550 адам ие болып, жеңілдетілген несие арқылы шаңырағына қол жеткізбек. Жастардың үйлі болуына Алматы қалалық әкімдігі мен Отбасы банкі қолдау көрсетіп отыр, деп хабарлайды Almaty.tv тілшісі.

Қызылорда қаласының тумасы Данагүл Ержұмақызы 2010 жылы Алматыға келіп, Абай атындағы Қазақ ұлттық педагогикалық университетінде білім алған. Қазақ тілі пәнінің мұғалімі 2014 жылдан бері №77 мектепте еңбек етіп келеді. 2019 жылы отбасын құрған ұстаз «сатып алу құқығынсыз жалға берілетін тұрғын үй бағдарламасы» жайлы естіп, бірден өтінім берген. Желтоқсан айында оң жауап алып, жалдамалы пәтерге ие болды.

 «Пәтерді Алатау ауданы, Көкқайнар ауданы, Арқалық көшесі №123 үйдің, бесінші қабатынан алдық. Жалпы шаршы метрі 29 квадрат. Бірақ жас отбасы бізгехан сарайындай болып көрінеді. Бағдарлама ақша жинап, жаңадан үй алуға мүмкіндік берді», – деді қала тұрғыны Данагүл Лекерова.

Дәл осы мүмкіндік Данагүл Ержұмақызына баспананың алғашқы жарнасына қаражат жинауға жол ашты. Нәтижесінде, ол биыл көптен күткен үйіне қол жеткізді. «Алматы жастары» бағдарламасы арқылы өтінім беріп, 14 жылға 5% мөлшерлемемен тұрғын үй заемын рәсімдеді.  Ұстаз Шұғыла шағынауданындағы екі бөлмелі пәтердің иесі атанды. Еңбегі мен табандылығы ақталып, Данагүлдің арманы ақиқатқа айналды.

 «Біріншіден, мемлекетімізге және Алматы қаласының әкімдігіне рахмет айтқым келеді. Себебі бізге мүмкіндік берілді. Біз 2019 жылы үйлендік. Неке қию туралы куәлікті алғаннан кейін, 11 қарашада құжат тапсырдық. Үш айдан кейін жеке үйге қоныстандық», – деді қала тұрғыны Данагүл Лекерова

Биылғы «Алматы жастары» бағдарламасына құжат қабылдау аяқталды. 14-26 наурыз аралығында 6600-ден астам жас маман өтінім берген. Қазір құжаттарды тексеру мен іріктеу жұмыстары жүріп жатыр.

Айта кетейік, биыл білім беру мен денсаулық сақтау саласының өкілдері белсенділік танытқан. Іріктеуден өткендердің тізімі сәуірдің соңында жарияланады.

 «2019 жылдан бері жалдамалы пәтерде тұрған жастарға 1050 квота бөлінді. Сала бойынша 881 өтініш түсті, оның 760-ын тексеріп, құжаттарын түгендеп 527 азаматқа жолдама бердік. Бүгіннен бастап олар банктен төлем қабілеттін дәлелдеуге көшті», – деді Коммуналдық инфрақұрылымды дамыту басқармасы Тұрғын үй бағдарламалары бөлімінің басшысы Рита Нұрбекқызы.

Сонымен қатар бағдарлама іске қосылғалы бері 5990 алматылық өз баспанасына қол жеткізген. Бұл — шаһардың өркендеуіне үлес қосып жүрген жас мамандарға көрсетілген үлкен қолдау. «Алматы жастары» — тек тұрғын үй жобасы емес, ол – болашаққа деген сенім мен тұрақтылықтың кепілі.

Мәди Мәлік, Сағынғали Мұңайтпасов

Оқи отырыңыз: Климент Тимирязев: «Алматы көшелері» бағдарламасының жаңа шығарылымы шықты