Жұлдызың жансын: Алматының Арбаты қалай безендірілді

Биыл жаңа жыл қарсаңында Алматының 12 көшесіне 1500 жарық элементі орнатылды. Әсіресе тұрғындардың сүйікті орны саналатын Арбат ерекше безендіріліп, Лондонның әйгілі Карнабиінен шабыт алған жарқын арт-нысанға айналды. Ондағы жарқын композициялар мен жүрекжарды сөздер көпшіліктің көңілінен шықты, деп хабарлайды Almaty.tv тілшісі.

Жаңа жыл қарсаңында ерекше безендірілген Алматының Арбаты әйгілі Карнаби көшесін еске түсіреді. Мұндағы мыңдаған жарқыраған шам көздің жауын алып, ертегі әлемінде жүргендей әсер қалдырады. Сондай-ақ орнатылған түрлі инсталляциялардың да мерекелік көңіл-күй сыйлайтыны сөзсіз.

Жібек жолы бойында ақшақарлардың, бұғылардың, аюлардың мүсіндері қойылып, алматылықтардың жиі баратын орнын арт-нысанға айналдырған. Тұрғындардың сүйікті жаяу жүргіншілер көшесі мыңдаған гирлянд шамы мен жарық қондырғылармен көмкеріліп, жайлы әрі сиқырлы атмосфераны қалыптастырды. Бірден көзге түсетін "Бақытты бол", "Жұлдызың жансын" деген жарқыраған ақжарма тілектер де ерекше назар аудартады. Қала қонақтары мерекелік безендірудің ғажап атмосфера сыйлайтынын айтып, мұнда естелікке суретке түсу үшін келгендерін жеткізді.

"Алматыға 5 күнге келдім. Өзім үндістандықпын. Ауа райы да, адамдары да ұнады. Көшедегі безендіру керемет!" – деді турист Анил Шарма.

"Қытайдан келдім.  Декорация өте әдемі жасалған. Қазақстанға бірінші алғаш келуіміз. Баршаңызға жаңа жыл құтты болсын!" – деді турист Коби Ип.

Биыл мереке қарсаңында қалаға 80 шырша қойылса, соның бірі осы Арбатта орналасқан. Биіктігі 10 метр болатын жаңа жылдық атрибут түрлі-түсті шарлармен, жарқыраған шамдармен және жұлдыздармен безендірілген.

"Биыл әдемі безендірілген. Отбасымызбен арнайы келдік. Аралап суретке түсіп жатырмыз", – деді қала тұрғыны Шыңғысхан Мүтәліп.

"Достарыммен келіп, қыдырып, уақыт өткізуге болады. Әдемі! Көңіл-күйің көтеріледі", – деді қала тұрғыны Салтанат Қуанышева.

Жыл соңына дейін Арбатта жәрмеңкелер, көрмелер, концерттер ұйымдастырыла бермек.

Еске салайын, биыл шаһарды безендіруге 800 миллион теңге бөлінген. Жарқыраған шамдар мен басқа да элементтердің арқасында көшелер мен алаңдар әсем күйге еніп, керемет көрініс беріп тұр.

Жансая Олжабек, Ғани Қалуов

Оқи отырыңыз: Президент шыршасы: жаңа жылдық мерекеге әр өңірден келген 100 бала қатысты