Ақ шағала: Алматыда республикалық байқаудың қалалық кезеңі аяқталды

Алматыдағы Оқушылар сарайында 13 шығармашылық ұжым «Ақ шағала» республикалық хореографиялық фестиваліне жолдама алу үшін бақ сынады, деп хабарлайды Almaty.tv тілшісі.

Көркемдік өнер, қойылымның ерекшелігі, әртістік қабілет және техникалық шеберлік. Кәсіби қазылар алқасы қатысушыларды осы критерийлер бойынша сынады. Оқушылар сарайының сахнасында өнерпаздар мың бұралған билерімен, көздің жауын алатындай ұлттық киімдерімен көпті тәнті етті.

 «Бұл – «Ақ шағала» республикалық байқауының қалалық кезеңі. Байқауға аудандық іріктеуден әр районнан 3 командадан, 3 ансамбль және оқушылар сарайының бір ұжым қатысады. Алғашқы кезеңде міндетті түрде қазақ биін, ал екінші кезеңде қалаған биін билейді», – деді Оқушылар сарайының бөлім жетекшісі Бауыржан Бектаев.

«Ақ шағала» республикалық хореографиялық фестивалінде Алматы қаласының атынан өнер көрсету үшін 13 команда бақ сынасты. Шығармашылық сайыста 10 мен 13 және 14 пен 17 жас аралығындағы бишілер өнер көрсетті. Әр топ екі түрлі жанрда жарысқа түсті: бірі – ұлттық би, екіншісі – заманауи бағыттағы хореография. Ұйымдастырушылар қатысушылардың жоғары дайындықпен келгенін айтып, жеңімпазды анықтау оңай болмағанын тілге тиек етті.

 «Латин және қазақша «Айгөлек» биін биледік. Қатты алаңдамадық.  Себебі сахнада өнер көрсетіп үйреніп қалдық. Оқушылар сарайында 5 жылдан бері биге қатысамын», – деді қатысушы Айша Асқар  

Байқау қорытындысы бойынша үздік атанған өнерпаздар арнайы марапаттарға ие болып, «Ақ шағала» республикалық фестивалінде Алматының намысын қорғайтын болады.

Әйкерім Пернебек, Аида Иманәли, Рашидин Яқупов