Атырау облысында теміржолдағы апатқа байланысты 6 жолаушылар пойызы кешігеді

Атырау облысы Тендік станциясындағы теміржол өткелінде жүк көлігі мен жүк пойызымен соқтығысуы салдарынан, 6 жолаушылар пойызының жүру уақыты кешіктіріледі, деп хабарлайды Almaty.tv.

 «Жолаушылар тасымалы» АҚ баспасөз қызметінен хабарлағандай, мына пойыздар кідіреді:

• №313 «Атырау – Маңғыстау»;
• №314 «Маңғыстау – Атырау»;
• №42 «Алматы – Атырау»;
• №41 «Атырау – Алматы»;
• №123 «Волгоград – Ташкент»;
• №691 «Атырау – Ақтөбе».

Атырау қаласы әкімдігі жолаушыларды уақытылы тасымалдауды қамтамасыз ету мақсатында Атырау станциясынан Қаработан станциясына дейін және кері бағытта арнайы автобустар ұйымдастырды.

«Ұлттық тасымалдаушы жолаушыларды тамақпен қамтамасыз ету шараларын қолға алып, пойыз қозғалысының жай-күйі туралы SMS-хабарламалар және вокзалдардағы ақпараттық тақталар арқылы жедел мәлімет таратуды жүзеге асыруда. Жолаушылар пойыздарының кідірісі туралы толық ақпарат алу үшін 1433 тегін нөміріне хабарласуға болады», - делінген хабарламада.

Қазіргі уақытта Тендік станциясындағы теміржол өткелінде болған оқиғаның салдарынан қалпына келтіру жұмыстары жүргізілуде. Қозғалысты тезірек қалыпқа келтіру мақсатында арнайы пойыз жөнелтілді.

Пойыздың бір сағаттан астам кідірісі болған жағдайда, Қазақстан Республикасының теміржол көлігімен жолаушыларды, жолжүктi, жүк-жолжүктi және пошта жөнелтiмдерiн тасымалдау қағидаларына сәйкес, жолаушыларға келесі төлемдер қарастырылған:

• сапардан бас тартқан жолаушыларға – жол жүру құны толық көлемде қайтарылады;
• жол бойында сапарды тоқтатқан жағдайда – жүріп өтпеген қашықтықтың жол жүру құны өтеледі;
• пойыз кешіккен жағдайда – әр толық кешіккен сағат үшін жол жүру құнының 3%-ы мөлшерінде, бірақ толық билет құнынан аспайтын өтемақы төленеді.

Ұлттық тасымалдаушының жолаушылар пойызы кешіккен жағдайда өтемақыны «Жолаушылар тасымалы» АҚ-ның билет кассаларынан жолаушының өтініші бойынша алуға болады.

Оқи отырыңыз: Атырау маңында пойыз жүк көлігімен соқтығысты: оқиға орнына құтқарушылар келді