Павлодарда картопты қымбат бағаға сатып келген дүкеннің иесі жазаланды

Жергілікті дүкендердің кейбірі картоптың келісін 350 теңгеден алып, 420 теңгеге сатқан. Үстеме баға 20%-ға дейін өскені анықталды, деп хабарлайды Almaty.tv тілшісі ҚазАқпаратқа сілтеме жасап.

Облыстық Сауда және тұтынушылардың құқықтарын қорғау департаменті картоптың сауда үстемесін 16,4%-дан 20%-ға дейін негізсіз арттырған сауда дүкендерін анықтады.

"Департамент қызметкерлері Павлодар қаласы бойынша 10 көкөніс дүкенін жоспардан тыс тексеріп шықты. Нәтижесінде олардың 8-інде картоптың тым қымбатқа сатылып жатқаны белгілі болды. Үстеме бағаға бекітілген шек 15%-дан аспауы керек болса, бұл дүкендер 16,4%-дан 20 %-ға дейін арттырып жіберген. Олар өнімнің келісін 350 теңгеден сатып алып, тұтынушыларға 420 теңгеден саудалаған", - деп хабарлады Павлодар облысы бойынша Сауда және тұтынушылардың құқықтарын қорғау департаменті басшысының орынбасары Нұрсұлу Әубәкірова.

ҚР «Сауда қызметін реттеу туралы» заңына сәйкес сауда орындары әкімшілік жауапкершілікке тартылған.

Оқи отырыңыз: Қазақстанның агроөнеркәсіптік кешені 1,1 млн-нан астам адамды жұмыспен қамтамасыз етуде